ಟ್ರಂಪ್-ನೆತನ್ಯಾಹು ವಿರುದ್ಧ ಇರಾನ್‌ನ ಹೊಸ ಮಾನಸಿಕ ಸಮರ! ಸಾರ್ವಜನಿಕ ಜಾಹೀರಾತುಗಳ ಮೂಲಕ ಬೆದರಿಕೆ ಸಂದೇಶ ಯಾಕೆ?

ಡಿ.ಸಿ.ಪ್ರಕಾಶ್, ಸಂಪಾದಕರು 

ಅಮೆರಿಕ ಮತ್ತು ಇರಾನ್ ನಡುವಿನ ಉದ್ವಿಗ್ನತೆ ದಿನದಿಂದ ದಿನಕ್ಕೆ ತೀವ್ರಗೊಳ್ಳುತ್ತಿರುವ ನಡುವೆಯೇ, ಸಾರ್ವಜನಿಕ ಸ್ಥಳಗಳಲ್ಲಿನ ದೈತ್ಯ ಜಾಹೀರಾತು ಫಲಕಗಳು ಮತ್ತು ಭಿತ್ತಿಚಿತ್ರಗಳ ಮೂಲಕ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹಾಗೂ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರನ್ನು ನೇರವಾಗಿ ಗುರಿಯಾಗಿಸಿಕೊಂಡು ಇರಾನ್ ಹೊಸ ರೀತಿಯ ಮಾನಸಿಕ ಪ್ರಚಾರ ಅಭಿಯಾನ ಆರಂಭಿಸಿದೆ. ಇದು ಕೇವಲ ಪ್ರಚಾರವಲ್ಲ, ಮಾಹಿತಿ ಯುದ್ಧದ ಭಾಗವಾಗಿರುವ ರಾಜಕೀಯ ಸಂದೇಶ ಎಂದು ವಿಶ್ಲೇಷಿಸಲಾಗುತ್ತಿದೆ.

ಅಮೆರಿಕ–ಇರಾನ್ ಕದನ ವಿರಾಮದ ಅವಧಿ ಮುಗಿದ ಬಳಿಕ, ಅಮೆರಿಕವು ಇರಾನ್‌ನ ಕರಾವಳಿ ಕಣ್ಗಾವಲು ಕೇಂದ್ರಗಳು, ವಾಯು ರಕ್ಷಣಾ ವ್ಯವಸ್ಥೆಗಳು, ಮಿಲಿಟರಿ ಲಾಜಿಸ್ಟಿಕ್ಸ್ ಮೂಲಸೌಕರ್ಯಗಳು ಹಾಗೂ ಕಡಲ ಕಾರ್ಯಾಚರಣೆಗಳಿಗೆ ಸಂಬಂಧಿಸಿದ ಹಲವು ನೆಲೆಗಳ ಮೇಲೆ ಯುದ್ಧ ವಿಮಾನಗಳು, ಡ್ರೋನ್‌ಗಳು ಮತ್ತು ಯುದ್ಧನೌಕೆಗಳ ಮೂಲಕ ದಾಳಿ ನಡೆಸುತ್ತಿದೆ ಎಂದು ಅಮೆರಿಕದ ಸೆಂಟ್ಕಾಮ್ (CENTCOM) ಮಾಹಿತಿ ನೀಡಿದೆ.

ಇದರ ಬೆನ್ನಲ್ಲೇ, ಟೆಹ್ರಾನ್ ನಗರದ ಪ್ರಮುಖ ಪ್ರದೇಶದಲ್ಲಿ “Sea of Revenge” (ಸೇಡಿನ ಸಮುದ್ರ) ಎಂಬ ಶೀರ್ಷಿಕೆಯೊಂದಿಗೆ ದೈತ್ಯ ಭಿತ್ತಿಚಿತ್ರವನ್ನು ಇರಾನ್ ಸರ್ಕಾರ ಅನಾವರಣಗೊಳಿಸಿದೆ. ಈ ಚಿತ್ರದಲ್ಲಿ ಟ್ರಂಪ್ ಮತ್ತು ನೆತನ್ಯಾಹು ರಕ್ತದ ಕೆಂಪು ಸಮುದ್ರದಲ್ಲಿ ಮುಳುಗುತ್ತಿರುವ ದೃಶ್ಯವನ್ನು ಚಿತ್ರಿಸಲಾಗಿದ್ದು, ಪರ್ಷಿಯನ್ ಹಾಗೂ ಇಂಗ್ಲಿಷ್ ಭಾಷೆಗಳಲ್ಲಿ “ನೀವಿಬ್ಬರೂ ಇರಾನ್ ರಾಷ್ಟ್ರದ ಸೇಡಿನ ಸಮುದ್ರದಲ್ಲಿ ಮುಳುಗುವಿರಿ” ಎಂಬ ಸಂದೇಶವನ್ನು ಬರೆಯಲಾಗಿದೆ.

ಇರಾನಿನ ಕ್ರಾಂತಿಕಾರಿ ಗಾರ್ಡ್ ಕಾರ್ಪ್ಸ್ (IRGC) ಜತೆ ಸಂಬಂಧ ಹೊಂದಿರುವ ತಸ್ನಿಮ್ ಸುದ್ದಿ ಸಂಸ್ಥೆ ಈ ಭಿತ್ತಿಚಿತ್ರದ ವಿವರಗಳನ್ನು ಪ್ರಕಟಿಸಿದ್ದು, ಇದು ದೇಶದ ಪ್ರತಿರೋಧದ ಸಂಕೇತ ಎಂದು ಹೇಳಿದೆ.

ಇದಕ್ಕೂ ಮುನ್ನ, ಟೆಹ್ರಾನ್‌ನ ಎಂಗೆಲಾಬ್ (Enghelab) ಚೌಕದಲ್ಲಿ ಟ್ರಂಪ್ ತೆರೆದ ಕಪ್ಪು ಶವಪೆಟ್ಟಿಗೆಯಲ್ಲಿ ಮಲಗಿರುವಂತೆ ಚಿತ್ರಿಸಿರುವ ಮತ್ತೊಂದು ದೈತ್ಯ ಜಾಹೀರಾತು ಫಲಕವನ್ನು ಪ್ರದರ್ಶಿಸಲಾಗಿತ್ತು. ಅದರ ಮೇಲೆ ಟ್ರಂಪ್ ವಿರುದ್ಧ ಪ್ರಚೋದನಕಾರಿ ಘೋಷಣೆಗಳಿದ್ದರೆ, ಕೆಳಭಾಗದಲ್ಲಿ “ಮಿನಾಬ್ ಮಕ್ಕಳ ನೆನಪಿಗಾಗಿ” ಎಂಬ ಸಂದೇಶವೂ ಕಾಣಿಸಿಕೊಂಡಿತ್ತು. ಇದು ಸಂಘರ್ಷದ ವೇಳೆ ಮಿನಾಬ್ ಪ್ರದೇಶದಲ್ಲಿ ಮೃತಪಟ್ಟ ಮಕ್ಕಳನ್ನು ಉಲ್ಲೇಖಿಸುವ ಪ್ರಯತ್ನವಾಗಿದೆ.

ಇದೇ ರೀತಿ, ಟೆಹ್ರಾನ್‌ನ ವಾಲಿಯಾಸ್ರ್ ಚೌಕದಲ್ಲೂ ಟ್ರಂಪ್ ಅವರನ್ನು ಉಲ್ಲೇಖಿಸುವ ಮತ್ತೊಂದು ಪ್ರಚಾರ ಬ್ಯಾನರ್ ಪ್ರದರ್ಶಿಸಲಾಗಿದೆ. ಇಂತಹ ಸರಣಿ ಜಾಹೀರಾತುಗಳು ಮತ್ತು ಭಿತ್ತಿಚಿತ್ರಗಳ ಮೂಲಕ ಇರಾನ್ ತನ್ನ ಜನರಲ್ಲಿ ರಾಷ್ಟ್ರಭಾವನೆ ಬಲಪಡಿಸುವುದರ ಜೊತೆಗೆ, ಅಮೆರಿಕ ಮತ್ತು ಅದರ ಮಿತ್ರ ರಾಷ್ಟ್ರಗಳ ನಾಯಕರಿಗೆ ರಾಜಕೀಯ ಹಾಗೂ ಮಾನಸಿಕ ಸಂದೇಶ ರವಾನಿಸಲು ಯತ್ನಿಸುತ್ತಿದೆ ಎಂದು ತಜ್ಞರು ವಿಶ್ಲೇಷಿಸುತ್ತಿದ್ದಾರೆ.

ಅಂತರರಾಷ್ಟ್ರೀಯ ಮಟ್ಟದಲ್ಲಿಯೂ ಈ ಪ್ರಚಾರ ಅಭಿಯಾನ ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ. ಅಮೆರಿಕದ ಮಿಲಿಟರಿ ಒತ್ತಡಕ್ಕೆ ಪ್ರತಿಯಾಗಿ, ತಮ್ಮ ದೇಶ ಯುದ್ಧಕ್ಕೆ ಸಿದ್ಧವಾಗಿದೆ ಎಂಬ ಸಂದೇಶವನ್ನು ಜಗತ್ತಿಗೆ ತಲುಪಿಸಲು ಇರಾನ್ ಸಾರ್ವಜನಿಕ ಸ್ಥಳಗಳನ್ನೇ ಮಾಹಿತಿ ಯುದ್ಧದ ವೇದಿಕೆಯಾಗಿ ಬಳಸುತ್ತಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗುತ್ತಿದೆ.

ವಿಶ್ಲೇಷಕರ ಪ್ರಕಾರ, ಈ ದೈತ್ಯ ಜಾಹೀರಾತು ಫಲಕಗಳು ಕೇವಲ ಪ್ರಚಾರ ಸಾಮಗ್ರಿಗಳಲ್ಲ. ಜನರ ಮನೋಭಾವದ ಮೇಲೆ ಪ್ರಭಾವ ಬೀರುವ, ಎದುರಾಳಿಗಳಲ್ಲಿ ಆತಂಕ ಮತ್ತು ಒತ್ತಡ ಸೃಷ್ಟಿಸುವ ಹಾಗೂ ತನ್ನ ರಾಜಕೀಯ ಸಂಕಲ್ಪವನ್ನು ಪ್ರದರ್ಶಿಸುವ ಮಾನಸಿಕ ಯುದ್ಧ (Psychological Warfare)ದ ಭಾಗವಾಗಿ ಇರಾನ್ ಇವುಗಳನ್ನು ಬಳಸುತ್ತಿದೆ. ಹೀಗಾಗಿ, ಸಾರ್ವಜನಿಕ ಸ್ಥಳಗಳಲ್ಲಿನ ಈ ದೃಶ್ಯಗಳು ಇಂದಿನ ಯುದ್ಧಗಳು ಕೇವಲ ಗಡಿಗಳಲ್ಲಿ ಮಾತ್ರವಲ್ಲ, ಜನರ ಮನಸ್ಸಿನಲ್ಲಿಯೂ ನಡೆಯುತ್ತಿವೆ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸುತ್ತಿವೆ.