ಚಂದ್ರನ ಮೇಲೆ ಶಾಶ್ವತ ನೆಲೆಗಳನ್ನು ಸ್ಥಾಪಿಸಿ, ಭವಿಷ್ಯದ ಬಾಹ್ಯಾಕಾಶ ಅನ್ವೇಷಣೆಯಲ್ಲಿ ಪ್ರಾಬಲ್ಯ ಸಾಧಿಸುವ ಉದ್ದೇಶದಿಂದ ಅಮೆರಿಕ, ಚೀನಾ ಮತ್ತು ರಷ್ಯಾ ನಡುವೆ ಪೈಪೋಟಿ ತೀವ್ರಗೊಂಡಿದೆ. ಇದರ ಪ್ರಮುಖ ಭಾಗವಾಗಿ ಚಂದ್ರನ ದಕ್ಷಿಣ ಧ್ರುವದಲ್ಲಿ ಅಣು ವಿದ್ಯುತ್ ಸ್ಥಾವರಗಳನ್ನು ಸ್ಥಾಪಿಸುವ ಯೋಜನೆಗೆ ಈ ಮೂರು ಮಹಾಶಕ್ತಿಗಳು ವೇಗ ನೀಡಿವೆ.
ಚಂದ್ರನಲ್ಲಿ ಅಣು ವಿದ್ಯುತ್ ಏಕೆ?
ಚಂದ್ರನ ಮೇಲೆ ಮಾನವರನ್ನು ದೀರ್ಘಕಾಲ ಉಳಿಸಿಕೊಳ್ಳಲು ನಿರಂತರ ವಿದ್ಯುತ್ ಪೂರೈಕೆ ಅತ್ಯಂತ ಅಗತ್ಯ. ಚಂದ್ರನ ಹಗಲಿನಲ್ಲಿ ಸೌರಶಕ್ತಿಯಿಂದ ವಿದ್ಯುತ್ ಉತ್ಪಾದಿಸಲು ಸಾಧ್ಯವಾದರೂ, ಅಲ್ಲಿನ ರಾತ್ರಿ ಭೂಮಿಯ ಲೆಕ್ಕದಲ್ಲಿ ಸುಮಾರು 14 ದಿನಗಳ ಕಾಲ ಮುಂದುವರಿಯುತ್ತದೆ.
ಈ ಅವಧಿಯಲ್ಲಿ ತೀವ್ರ ಚಳಿ ಮತ್ತು ಸಂಪೂರ್ಣ ಕತ್ತಲೆ ಇರುವುದರಿಂದ ಸೌರಶಕ್ತಿ ಆಧಾರಿತ ವಿದ್ಯುತ್ ಉತ್ಪಾದನೆಗೆ ದೊಡ್ಡ ಸವಾಲು ಎದುರಾಗುತ್ತದೆ. ಹೀಗಾಗಿ, ಸೂರ್ಯನ ಬೆಳಕಿನ ಅವಶ್ಯಕತೆಯಿಲ್ಲದೆ ದೀರ್ಘಕಾಲ ನಿರಂತರವಾಗಿ ವಿದ್ಯುತ್ ಉತ್ಪಾದಿಸಬಲ್ಲ ಅಣು ವಿದ್ಯುತ್ ಸ್ಥಾವರಗಳು ಚಂದ್ರನ ಭವಿಷ್ಯದ ಮಾನವ ವಸತಿಗಳಿಗೆ ಪ್ರಮುಖ ಪರಿಹಾರವೆಂದು ವಿಜ್ಞಾನಿಗಳು ಪರಿಗಣಿಸಿದ್ದಾರೆ.
2030ರೊಳಗೆ ಅಮೆರಿಕದ ಗುರಿ
ಚಂದ್ರನ ಮೇಲೆ 20 ಕಿಲೋವಾಟ್ ಸಾಮರ್ಥ್ಯದ ಅಣು ವಿದ್ಯುತ್ ಸ್ಥಾವರವನ್ನು 2030ರ ಡಿಸೆಂಬರ್ ವೇಳೆಗೆ ಸ್ಥಾಪಿಸುವ ಗುರಿಯನ್ನು ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ ಹೊಂದಿದೆ.
ಮಾನವ ಹಸ್ತಕ್ಷೇಪವಿಲ್ಲದೆ ಕನಿಷ್ಠ ಐದು ವರ್ಷಗಳ ಕಾಲ ಸ್ವಯಂಚಾಲಿತವಾಗಿ ಕಾರ್ಯನಿರ್ವಹಿಸುವಂತೆ ಅಣು ಸ್ಥಾವರವನ್ನು ವಿನ್ಯಾಸಗೊಳಿಸಲು ನಾಸಾ ಗುತ್ತಿಗೆದಾರರಿಂದ ಪ್ರಸ್ತಾವನೆಗಳನ್ನು ಆಹ್ವಾನಿಸಿದೆ.
ಚೀನಾ-ರಷ್ಯಾ ಜಂಟಿ ಯೋಜನೆ
ಇತ್ತ ಚೀನಾ ಮತ್ತು ರಷ್ಯಾ ಕೂಡ ಜಂಟಿಯಾಗಿ ‘ಸೆಲಿನಾ’ ಹೆಸರಿನ ಚಂದ್ರ ಅಣು ವಿದ್ಯುತ್ ಸ್ಥಾವರ ಯೋಜನೆಯಲ್ಲಿ ಕಾರ್ಯನಿರ್ವಹಿಸುತ್ತಿವೆ.
ಸುಮಾರು 10 ಕಿಲೋವಾಟ್ ವಿದ್ಯುತ್ ಉತ್ಪಾದಿಸುವ ಸಾಮರ್ಥ್ಯ ಹೊಂದಿರುವ ಈ ಅಣು ಸ್ಥಾವರವು ಮಾನವ ಸಹಾಯವಿಲ್ಲದೆ ಸುಮಾರು 10 ವರ್ಷಗಳ ಕಾಲ ನಿರಂತರವಾಗಿ ಕಾರ್ಯನಿರ್ವಹಿಸುವಂತೆ ವಿನ್ಯಾಸಗೊಳಿಸಲಾಗಿದೆ ಎಂದು ಹೇಳಲಾಗಿದೆ. ಇದನ್ನು 2036ರ ವೇಳೆಗೆ ಚಂದ್ರನ ಮೇಲೆ ಸ್ಥಾಪಿಸುವ ಯೋಜನೆಯನ್ನು ಚೀನಾ ಮತ್ತು ರಷ್ಯಾ ಹೊಂದಿವೆ.
ಅಣು ಸ್ಥಾವರಗಳೇ ಹೊಸ ಅಪಾಯ?
ಚಂದ್ರನಿಗೆ ಅಣು ಸ್ಥಾವರಗಳನ್ನು ಕೊಂಡೊಯ್ಯುವುದು ಮತ್ತೊಂದು ದೊಡ್ಡ ಸವಾಲನ್ನೂ ತಂದೊಡ್ಡಿದೆ. ಅಣು ಸ್ಥಾವರವನ್ನು ಹೊತ್ತೊಯ್ಯುವ ರಾಕೆಟ್ ಉಡಾವಣೆಯ ವೇಳೆ ಅಪಘಾತ ಸಂಭವಿಸಿದರೆ, ವಿಕಿರಣಕಾರಿ ವಸ್ತುಗಳು ಭೂಮಿಯ ವಾತಾವರಣ ಅಥವಾ ಬಾಹ್ಯಾಕಾಶ ಪರಿಸರಕ್ಕೆ ಹರಡುವ ಅಪಾಯವಿದೆ ಎಂದು ಪರಿಸರ ಮತ್ತು ಬಾಹ್ಯಾಕಾಶ ತಜ್ಞರು ಎಚ್ಚರಿಸಿದ್ದಾರೆ.
ಚಂದ್ರ ಯಾರದ್ದು?
1967ರ ಅಂತರರಾಷ್ಟ್ರೀಯ ಬಾಹ್ಯಾಕಾಶ ಒಪ್ಪಂದದ ಪ್ರಕಾರ, ಯಾವುದೇ ದೇಶವೂ ಚಂದ್ರ ಅಥವಾ ಬಾಹ್ಯಾಕಾಶದ ಯಾವುದೇ ಭಾಗದ ಮೇಲೆ ಸಾರ್ವಭೌಮ ಹಕ್ಕು ಹೊಂದಲು ಸಾಧ್ಯವಿಲ್ಲ.
ಆದರೆ ಭದ್ರತಾ ಕಾರಣಗಳನ್ನು ಮುಂದಿಟ್ಟುಕೊಂಡು ಚೀನಾ-ರಷ್ಯಾ ಜಂಟಿ ಅಣು ಸ್ಥಾವರದ ಸುತ್ತ ‘ನಿಷೇಧಿತ ಪ್ರದೇಶ’ ಅಥವಾ ನಿರ್ಬಂಧಿತ ವಲಯವನ್ನು ನಿರ್ಮಿಸಿ, ಪರೋಕ್ಷವಾಗಿ ಆ ಪ್ರದೇಶದ ಮೇಲೆ ಪ್ರಾಬಲ್ಯ ಸಾಧಿಸುವ ಸಾಧ್ಯತೆ ಇದೆ ಎಂಬ ಆತಂಕ ಅಮೆರಿಕದ ವಲಯಗಳಲ್ಲಿ ವ್ಯಕ್ತವಾಗಿದೆ. ಇದೇ ಕಾರಣದಿಂದ ನಾಸಾ ತನ್ನ ಚಂದ್ರ ಯೋಜನೆಗಳಿಗೆ ಮತ್ತಷ್ಟು ವೇಗ ನೀಡುತ್ತಿದೆ ಎನ್ನಲಾಗಿದೆ.
ಚಂದ್ರನಲ್ಲಿ ಹೊಸ ಬಾಹ್ಯಾಕಾಶ ಪೈಪೋಟಿ?
ತಾಂತ್ರಿಕ ಸವಾಲುಗಳು, ಅಣು ವಿಕಿರಣದ ಅಪಾಯಗಳು ಮತ್ತು ಅಂತರರಾಷ್ಟ್ರೀಯ ಬಾಹ್ಯಾಕಾಶ ಕಾನೂನುಗಳ ನಿರ್ಬಂಧಗಳು ಒಂದೆಡೆಯಾದರೆ, ಮತ್ತೊಂದೆಡೆ ಚಂದ್ರನ ಮೇಲೆ ವಿದ್ಯುತ್ ಉತ್ಪಾದನಾ ಸಾಮರ್ಥ್ಯವನ್ನು ನಿರ್ಮಿಸಿ ಶಾಶ್ವತ ಹೆಜ್ಜೆ ಗುರುತು ಮೂಡಿಸಲು ಮಹಾಶಕ್ತಿಗಳು ನಡೆಸುತ್ತಿರುವ ವೇಗದ ಪೈಪೋಟಿ ಗಮನ ಸೆಳೆಯುತ್ತಿದೆ.
ಚಂದ್ರನ ಮೇಲೆ ಮೊದಲು ಶಾಶ್ವತ ನೆಲೆ ಸ್ಥಾಪಿಸುವವರು ಯಾರು? ಎಂಬ ಪ್ರಶ್ನೆಯ ಜೊತೆಗೆ, ಭವಿಷ್ಯದ ಬಾಹ್ಯಾಕಾಶ ಪ್ರಾಬಲ್ಯ ಯಾರ ಕೈ ಸೇರಲಿದೆ ಎಂಬ ಚರ್ಚೆಯೂ ಇದೀಗ ತೀವ್ರಗೊಂಡಿದೆ.
