ಕೊಚ್ಚಿ: ಕುವೈತ್ನ ಅಪಾರ್ಟ್ಮೆಂಟ್ನಲ್ಲಿ ಅಗ್ನಿ ದುರಂತದಲ್ಲಿ ಮೃತಪಟ್ಟ 45 ಭಾರತೀಯರ ಮೃತದೇಹಗಳನ್ನು ಭಾರತೀಯ ವಾಯುಪಡೆಯ ವಿಮಾನದ ಮೂಲಕ ಕೊಚ್ಚಿಗೆ ತರಲಾಯಿತು.
ಕುವೈತ್ನ ಮಂಗಾಬ್ನಲ್ಲಿರುವ ಅಪಾರ್ಟ್ಮೆಂಟ್ ಕಟ್ಟಡದಲ್ಲಿ ನಿನ್ನೆ (ಜೂನ್ 12) ಮುಂಜಾನೆ ಬೆಂಕಿ ಕಾಣಿಸಿಕೊಂಡಿತು. ಈ ಅಪಘಾತದಲ್ಲಿ 49 ಮಂದಿ ಸಾವನ್ನಪ್ಪಿದ್ದರು. 50ಕ್ಕೂ ಹೆಚ್ಚು ಮಂದಿ ಗಂಭೀರವಾಗಿ ಗಾಯಗೊಂಡು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಕುವೈತ್ ಅಧಿಕಾರಿಗಳು ಮೃತರ ಶವಗಳನ್ನು ಗುರುತಿಸಿ ಅವರ ಸ್ವಗ್ರಾಮಕ್ಕೆ ಕಳುಹಿಸುವಲ್ಲಿ ತೊಡಗಿದ್ದಾರೆ. ಅವರ ಮೃತದೇಹಗಳನ್ನು ಭಾರತಕ್ಕೆ ತರಲು ವಾಯುಪಡೆಯ ಸಿ130 ವಿಮಾನವು ನಿನ್ನೆ ಕುವೈತ್ಗೆ ಹಾರಿದೆ. ಅಲ್ಲಿಂದ ಮೃತರ ಶವ ಹೊತ್ತ ವಿಮಾನ ಕೊಚ್ಚಿ ತಲುಪಿದೆ. 31 ಶವಗಳನ್ನು ವಿಮಾನದಿಂದ ಕೆಳಗೆ ತರಲಾಯಿತು. ಉಳಿದ 14 ಶವಗಳನ್ನು ದೆಹಲಿಗೆ ಕೊಂಡೊಯ್ಯಲಾಗುತ್ತದೆ.
ಕೇಂದ್ರ ಸಚಿವರಾದ ಕೀರ್ತಿ ವರ್ಧನ್ ಸಿಂಗ್, ಸುರೇಶ್ ಗೋಪಿ, ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್, ರಾಜ್ಯ ಸಚಿವರು ಮತ್ತು ನಾಯಕರು ಹಾಗೂ ತಮಿಳುನಾಡು ಸರ್ಕಾರದ ಪರವಾಗಿ ಸಚಿವ ಸೆಂಜಿ ಮಸ್ತಾನ್ ಮುಂತಾದವರು ವಿಮಾನ ನಿಲ್ದಾಣದಲ್ಲಿ ಶ್ರದ್ಧಾಂಜಲಿ ಸಲ್ಲಿಸಿದರು. ಸರ್ವಧರ್ಮ ಪ್ರಾರ್ಥನೆಯೂ ನಡೆಯಿತು.
ಬಳಿಕ ಮೃತರ ಶವಗಳನ್ನು ಅವರವರ ಊರಿಗೆ ರವಾನಿಸಲಾಯಿತು. ಏಳು ಮಂದಿ ತಮಿಳರ ಮೃತದೇಹಗಳನ್ನು ಪ್ರತ್ಯೇಕ ಆಂಬ್ಯುಲೆನ್ಸ್ಗಳಲ್ಲಿ ಅವರ ಊರುಗಳಿಗೆ ರವಾನಿಸಲಾಯಿತು.
ಈ ವೇಳೆ ಪತ್ರಕರ್ತರೊಂದಿಗೆ ಮಾತನಾಡಿದ ಕೇರಳದ ಆರೋಗ್ಯ ಸಚಿವೆ ವೀಣಾ ಜಾರ್ಜ್, “ಕುವೈತ್ಗೆ ಹೋಗಲು ಅನುಮತಿ ಸಿಗದಿರುವುದು ದುರದೃಷ್ಟಕರ. ಅಗ್ನಿ ದುರಂತದಲ್ಲಿ ಸಾವನ್ನಪ್ಪಿದವರಲ್ಲಿ ಹೆಚ್ಚಿನವರು ಕೇರಳದವರು ಮತ್ತು ಚಿಕಿತ್ಸೆ ಪಡೆಯುತ್ತಿರುವವರಲ್ಲಿ ಹೆಚ್ಚಿನವರು ಕೂಡ ನಮ್ಮ ರಾಜ್ಯದವರು” ಎಂದು ಹೇಳಿದರು.
