ಯುರೋಪಿನ ಪ್ರಾಚೀನ ದೇಶ ಇಟಲಿ. ರೋಮನ್ ಸಂಸ್ಕೃತಿಯನ್ನು ಹೊಂದಿರುವ ಆ ದೇಶದಲ್ಲಿ ಪ್ರಾಚೀನ ವರ್ಣಚಿತ್ರಗಳಿಗೆ ಹಾಗೂ ವರ್ಣಚಿತ್ರಕಾರರಿಗೆ ಇಂದಿಗೂ ಅನೇಕ ಉತ್ಸಾಹಿಗಳಿದ್ದಾರೆ.
ಆ ದೇಶದ 605 ಆಸನಗಳ ಸಂಸತ್ತಿನ ಸದಸ್ಯರಾದ ಮತ್ತು ಸಂಸ್ಕೃತಿ ಸಚಿವರೂ ಆಗಿರುವ 71 ವರ್ಷದ ವಿಟ್ಟೋರಿಯೊ ಸ್ಗಾರ್ಬಿ (Vittorio Sgarbi) ಪುರಾತನ ಕಲಾಕೃತಿಗಳು ಮತ್ತು ಅಪರೂಪದ ವರ್ಣಚಿತ್ರಗಳನ್ನು ಖರೀದಿಸುವುದರಲ್ಲಿ ಉತ್ಸಾಹಿಯಾಗಿದ್ದಾರೆ.
2013ರಲ್ಲಿ, ಇಟಲಿಯ ಉತ್ತರ ಪೀಡ್ಮಾಂಟ್ (Piedmont) ಪ್ರದೇಶದ ಒಬ್ಬರ ಒಡೆತನದ ಕೋಟೆಯಲ್ಲಿ, ಹಲವಾರು ವರ್ಷಗಳಿಂದ ಇದ್ದ 17ನೇ ಶತಮಾನದ ರೂಟಿಲಿಯೊ ಮನೆಟ್ಟಿ (Rutilio Manetti) ಎಂಬ ಕಲಾವಿದರಿಂದ ಬರೆದ ದಿ ಕ್ಯಾಪ್ಚರ್ ಆಫ್ ಸೈಂಟ್ ಫೇಟರ್ (The Capture of Saint Peter) ಎಂಬ ಚಿತ್ರಕಲೆ ಕಳ್ಳತನವಾಗಿತ್ತು.
2021ರಲ್ಲಿ ಸಚಿವ ಸ್ಗಾರ್ಬಿ ಆಯೋಜಿಸಿದ್ದ ಪ್ರದರ್ಶನದಲ್ಲಿ ಈ ವರ್ಣಚಿತ್ರವನ್ನು ಮತ್ತೆ ಪ್ರದರ್ಶಿಸಲಾಯಿತು. ಇದು 2013ರಲ್ಲಿ ಕಣ್ಮರೆಯಾದ ಪೇಂಟಿಂಗ್ ಅನ್ನು ಹೋಲುತ್ತದೆಯಾದರೂ, ಪೇಂಟಿಂಗ್ನ ಮೇಲಿನ ಎಡ ಮೂಲೆಯಲ್ಲಿ ಮೇಣದಬತ್ತಿ ಕಂಡುಬಂದಿದೆ.
ಸುಮಾರು 20 ವರ್ಷಗಳ ಹಿಂದೆ ತನ್ನ ತಾಯಿ ಖರೀದಿಸಿದ ಹಳೆಯ ವಿಲ್ಲಾದಲ್ಲಿ ತಾನು ಅದನ್ನು ಕಂಡುಕೊಂಡಿದ್ದೇನೆ ಮತ್ತು ಇದು ರೂಟಿಲಿಯೊ ಮನೆಟ್ಟಿಯ “ಮೂಲ” ಪೇಂಟಿಂಗ್ ಮತ್ತು 2013ರಲ್ಲಿ ಕಳವಾಗಿದ್ದು “ನಕಲು” ಎಂದು ಸ್ಗಾರ್ಬಿ ಹೇಳಿಕೊಂಡಿದ್ದಾರೆ.
ಆದರೆ 2013ರಲ್ಲಿ ಸ್ಗಾರ್ಬಿಯವರು ಕದ್ದ ಪೇಂಟಿಂಗ್ ಗೆ ಚಿತ್ರಕಲಾ ತಜ್ಞರ ನೆರವಿನಿಂದ ಕೆಲವು ಬದಲಾವಣೆ ಮಾಡಿ ಹೊಸದಾಗಿ ಕಾಣುವಂತೆ ಮಾಡಿದ್ದಾರೆ ಎಂಬ ಆರೋಪ ಕೇಳಿಬಂದಿತ್ತು.
ಅಂದಿನಿಂದ ನಾಪತ್ತೆಯಾಗಿರುವ ಪೇಂಟಿಂಗ್ ಅನ್ನು ಪತ್ತೆ ಹಚ್ಚಲು ಮತ್ತು ಸ್ಗಾರ್ಬಿಯ ಪೇಂಟಿಂಗ್ ಅಸಲಿಯೇ ಅಥವಾ 2013ರಲ್ಲಿ ಕಳವಾದ ಪೇಂಟಿಂಗೇ ಎಂಬುದನ್ನು ಕಂಡುಹಿಡಿಯಲು ತನಿಖೆಯನ್ನು ಪ್ರಾರಂಭಿಸಲಾಗಿದೆ. ಟೀಕೆಗಳ ಪರಿಣಾಮವಾಗಿ ಇದೀಗ ಸಚಿವ ವಿಟ್ಟೋರಿಯೊ ಸ್ಗಾರ್ಬಿ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ.
“ನಾನು ಯಾವುದೇ ಅಪರಾಧ ಮಾಡಿಲ್ಲ. ನನ್ನ ಸ್ಥಾನವು ತನಿಖೆಗೆ ಅಡ್ಡಿಯಾಗಬಹುದು ಎಂಬ ಕಾರಣಕ್ಕಾಗಿ ನಾನು ರಾಜೀನಾಮೆ ನೀಡಿದ್ದೇನೆ. ನಾನು ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿಗೆ ತಿಳಿಸಿದ್ದೇನೆ” ಎಂದು ವಿಟ್ಟೋರಿಯೊ ಸ್ಗಾರ್ಬಿ ಹೇಳಿದ್ದಾರೆ.
