ಇಂಫಾಲ: ಮಣಿಪುರದಲ್ಲಿ ಹೊಸದಾಗಿ ನಿರ್ಮಿಸಲಾಗುತ್ತಿದ್ದ ಸರ್ಕಾರಿ ಶಾಲಾ ಕಟ್ಟಡವನ್ನು ಜೆಸಿಬಿ ಯಂತ್ರದಿಂದ ಕೆಡವಿದ ಬಿಜೆಪಿ ಶಾಸಕನ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ. ಖುರೈ ಹೈಕ್ರುಮಖಾಂಗ್ ಜೂನಿಯರ್ ಹೈ ಸ್ಕೂಲ್ ಮಣಿಪುರದ ಇಂಫಾಲ್ ಪೂರ್ವ ಜಿಲ್ಲೆಯಲ್ಲಿದೆ. ಈಶಾನ್ಯ ವಿಶೇಷ ಮೂಲಸೌಕರ್ಯ ಅಭಿವೃದ್ಧಿ ಯೋಜನೆಯ ನಿಧಿಯಿಂದ ಇಲ್ಲಿ ಹೊಸ ತರಗತಿ ಕೊಠಡಿಗಳು ಮತ್ತು ಕಂಪ್ಯೂಟರ್ ಕೊಠಡಿಯ ನಿರ್ಮಾಣ ಕಾರ್ಯ ನಡೆಯುತ್ತಿತ್ತು. ಖುರೈ ಕ್ಷೇತ್ರದ ಬಿಜೆಪಿ ಶಾಸಕ ಸುಸಿಂದ್ರೋ ಮೈತೇಯಿ (Susindro Meitei) ಅವರು ಆ ಸ್ಥಳವು ನಿರ್ಮಾಣಕ್ಕೆ ‘ಅನರ್ಹ’ ಎಂದು ಈ ಹಿಂದೆಯೇ ಹೇಳಿದ್ದು, ಕಟ್ಟಡವನ್ನು ಕೆಡವುವುದಾಗಿ ಬೆದರಿಕೆ ಹಾಕಿದ್ದರು ಎಂದು ವರದಿಯಾಗಿದೆ.
ಈ ಹಿನ್ನೆಲೆಯಲ್ಲಿ, ಕಳೆದ 18 ರಂದು ಜೆಸಿಬಿ ಯಂತ್ರದಿಂದ ಹೊಸದಾಗಿ ನಿರ್ಮಿಸಲಾದ ಕಟ್ಟಡಗಳನ್ನು ಕೆಡವಿ ಹಾಕಲಾಗಿದೆ. ಶಾಸಕರ ಆದೇಶದ ಮೇರೆಗೆ ಈ ಘಟನೆ ನಡೆದಿದೆ ಎಂದು ಆರೋಪಿಸಿ, ಸ್ಥಳ ಮೇಲ್ವಿಚಾರಕ ಕಾನ್ಸಮ್ ಸಂತೋಷ್ ಮೈತೇಯಿ ಬೌರಂಪೇಟ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಅದರಂತೆ, ಪೊಲೀಸರು ನಿನ್ನೆ ಶಾಸಕ ಸುಸಿಂದ್ರೋ ಮೈತೇಯಿ ವಿರುದ್ಧ ಸಾರ್ವಜನಿಕ ಆಸ್ತಿಗೆ ಹಾನಿ ಮತ್ತು ಅತಿಕ್ರಮಣ ಸೇರಿದಂತೆ ಸೆಕ್ಷನ್ಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಏತನ್ಮಧ್ಯೆ, ‘ಕಟ್ಟಡವನ್ನು ಕೆಡವಿದ್ದು ನಾನೇ’ ಎಂದು ಶಾಸಕರು ಒಪ್ಪಿಕೊಂಡಿದ್ದಾರೆ ಎಂಬ ಮಾಹಿತಿ ಹೊರಬಿದ್ದಿದೆ.
