ಡಿ.ಸಿ.ಪ್ರಕಾಶ್, ಸಂಪಾದಕರು
ನವದೆಹಲಿ: ನ್ಯಾಯಾಲಯದ ಹೆಸರಿನಲ್ಲಿ ನಕಲಿ ಆದೇಶಗಳನ್ನು ಸೃಷ್ಟಿಸಿ, ಅವುಗಳ ಆಧಾರದಲ್ಲಿ ಕೇಂದ್ರ ಸರ್ಕಾರದ ದೂರಸಂಪರ್ಕ ಇಲಾಖೆಯ ಮೂಲಕ 129 ಬೆಟ್ಟಿಂಗ್ ವೆಬ್ಸೈಟ್ಗಳನ್ನು ನಿರ್ಬಂಧಿಸಿರುವ ಗಂಭೀರ ಪ್ರಕರಣ ದೇಶಾದ್ಯಂತ ಸಂಚಲನ ಮೂಡಿಸಿದೆ. ನ್ಯಾಯಾಲಯದ ಅಧಿಕೃತ ಮುದ್ರೆ, ಲೋಗೋ ಮತ್ತು ಕ್ಯೂಆರ್ ಕೋಡ್ಗಳನ್ನೇ ನಕಲಿಸಿ ಸರ್ಕಾರಿ ಅಧಿಕಾರಿಗಳನ್ನು ವಂಚಿಸಿರುವ ಈ ಪ್ರಕರಣ ಇದೀಗ ಪ್ರಧಾನಿ ಕಚೇರಿಯ ಗಮನಕ್ಕೂ ಬಂದಿದೆ.
ಪ್ರಕರಣದ ಗಂಭೀರತೆಯನ್ನು ಪರಿಗಣಿಸಿರುವ ಪ್ರಧಾನಿ ನರೇಂದ್ರ ಮೋದಿ ಅವರ ಕಚೇರಿ, ಶನಿವಾರ (ನವೆಂಬರ್ 14) ದೂರಸಂಪರ್ಕ ಇಲಾಖೆಯ ಕಾರ್ಯದರ್ಶಿ ಅಮಿತ್ ಅಗರ್ವಾಲ್ ಅವರನ್ನು ಕರೆಸಿ ವಿವರಣೆ ಕೇಳಿದೆ ಎಂದು ರಾಯಿಟರ್ಸ್ ವರದಿ ಮಾಡಿದೆ. ಈ ಬೆಳವಣಿಗೆಯಿಂದ ಕೇಂದ್ರ ಸರ್ಕಾರದ ವೆಬ್ಸೈಟ್ ನಿರ್ಬಂಧ ಪ್ರಕ್ರಿಯೆಯಲ್ಲಿರುವ ಲೋಪಗಳು ಬಹಿರಂಗವಾಗಿವೆ.
ಎರಡು ಹೈಕೋರ್ಟ್ಗಳ ಹೆಸರಿನಲ್ಲಿ ನಕಲಿ ಆದೇಶ!
ರಾಜಸ್ಥಾನ ಹೈಕೋರ್ಟ್ ಮತ್ತು ಅಲಹಾಬಾದ್ ಹೈಕೋರ್ಟ್ ಹೆಸರಿನಲ್ಲಿ ಎರಡು ನಕಲಿ ನ್ಯಾಯಾಲಯದ ಆದೇಶಗಳನ್ನು ಸೃಷ್ಟಿಸಲಾಗಿದೆ. ಈ ಆದೇಶಗಳನ್ನು ವಕೀಲರ ಸೋಗಿನಲ್ಲಿ ಕೆಲವರು ಇ-ಮೇಲ್ ಮೂಲಕ ಕೇಂದ್ರದ ದೂರಸಂಪರ್ಕ ಇಲಾಖೆಗೆ ಕಳುಹಿಸಿದ್ದಾರೆ.
ಮೊದಲ ನಕಲಿ ಆದೇಶವು ಜುಲೈ 19ರಂದು ಇಲಾಖೆಗೆ ತಲುಪಿದ್ದು, ಅದರ ಆಧಾರದಲ್ಲಿ ಜುಲೈ 21ರಂದು 34 ಬೆಟ್ಟಿಂಗ್ ವೆಬ್ಸೈಟ್ಗಳನ್ನು ನಿರ್ಬಂಧಿಸುವಂತೆ ಇಂಟರ್ನೆಟ್ ಸೇವಾ ಪೂರೈಕೆದಾರರಿಗೆ ಸೂಚನೆ ನೀಡಲಾಗಿದೆ.
ಎರಡನೇ ನಕಲಿ ಆದೇಶವು ಅಲಹಾಬಾದ್ ಹೈಕೋರ್ಟ್ ಹೆಸರಿನಲ್ಲಿ ಆಗಸ್ಟ್ 14ರಂದು ಹೊರಡಿಸಲಾಗಿದೆ ಎಂದು ತೋರಿಸಲಾಗಿತ್ತು. ಆಗಸ್ಟ್ 22ರಂದು ಇಲಾಖೆಗೆ ಕಳುಹಿಸಲಾದ ಈ ಆದೇಶದ ಆಧಾರದಲ್ಲಿ ಸೆಪ್ಟೆಂಬರ್ 2ರಂದು ಮತ್ತೆ 95 ವೆಬ್ಸೈಟ್ಗಳನ್ನು ನಿರ್ಬಂಧಿಸಲು ಸೂಚಿಸಲಾಗಿದೆ.
ಹೀಗೆ ಎರಡು ಪ್ರತ್ಯೇಕ ಆದೇಶಗಳ ಮೂಲಕ ಒಟ್ಟು 129 ವೆಬ್ಸೈಟ್ಗಳ ಪ್ರವೇಶಕ್ಕೆ ನಿರ್ಬಂಧ ವಿಧಿಸಲಾಗಿದೆ.
ನ್ಯಾಯಾಲಯದ ಮುದ್ರೆ, ಲೋಗೋ ಎಲ್ಲವೂ ನಕಲಿ!
ಈ ನಕಲಿ ಆದೇಶಗಳಲ್ಲಿ ನ್ಯಾಯಾಲಯದ ಅಧಿಕೃತ ಲೋಗೋ, ಭಾರತದ ರಾಷ್ಟ್ರೀಯ ಲಾಂಛನ ಹೊಂದಿರುವ ನೀಲಿ ಬಣ್ಣದ ಮುದ್ರೆ ಹಾಗೂ ಸಹಿಗಳನ್ನು ಬಳಸಲಾಗಿದೆ. ಅಲಹಾಬಾದ್ ಹೈಕೋರ್ಟ್ ಹೆಸರಿನಲ್ಲಿ ಸೃಷ್ಟಿಸಲಾದ ಆದೇಶದಲ್ಲಿ ಕ್ಯೂಆರ್ ಕೋಡ್ ಕೂಡ ಅಳವಡಿಸಲಾಗಿತ್ತು.
ಆದರೆ, ಆ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಿದಾಗ ನ್ಯಾಯಾಲಯದ ಅಧಿಕೃತ ದಾಖಲೆಗಳ ಬದಲಿಗೆ ಸಂಬಂಧವಿಲ್ಲದ ವೆಬ್ಪುಟ ತೆರೆದುಕೊಳ್ಳುತ್ತಿತ್ತು.
ರಾಯಿಟರ್ಸ್ ಸುದ್ದಿಸಂಸ್ಥೆಯ ತನಿಖೆಯಲ್ಲಿ ಎರಡೂ ಆದೇಶಗಳು ಸಂಬಂಧಪಟ್ಟ ಹೈಕೋರ್ಟ್ಗಳ ಅಧಿಕೃತ ದಾಖಲೆಗಳಲ್ಲಿ ನೋಂದಣಿಯಾಗಿಲ್ಲ ಎಂಬುದು ಪತ್ತೆಯಾಗಿದೆ. ಈ ಕುರಿತು ಸ್ಪಷ್ಟನೆ ಕೇಳಿದಾಗ ರಾಜಸ್ಥಾನ ಹೈಕೋರ್ಟ್ನ ರಿಜಿಸ್ಟ್ರಾರ್, ತನ್ನ ಹೆಸರಿನಲ್ಲಿ ಹೊರಡಿಸಲಾದ ಆದೇಶ ನಕಲಿಯಾಗಿರುವಂತೆ ಕಾಣುತ್ತಿದೆ ಎಂದು ತಿಳಿಸಿದ್ದಾರೆ.
ಅಲಹಾಬಾದ್ ಹೈಕೋರ್ಟ್ ಕೂಡ ತನ್ನ ಹೆಸರಿನಲ್ಲಿ ಯಾವುದೇ ಆದೇಶ ಹೊರಡಿಸಿಲ್ಲ ಎಂದು ದೃಢಪಡಿಸಿದೆ.
ಪೊಲೀಸರಿಂದ ತನಿಖೆ; 24 ಪ್ರಶ್ನೆಗಳೊಂದಿಗೆ ಇಲಾಖೆಗೆ ನೋಟಿಸ್!
ಅಲಹಾಬಾದ್ ಹೈಕೋರ್ಟ್ನ ಹೆಸರಿನಲ್ಲಿ ನಕಲಿ ಆದೇಶ ಸೃಷ್ಟಿಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ನವೆಂಬರ್ 6ರಂದು ಉತ್ತರ ಪ್ರದೇಶದ ಪ್ರಯಾಗ್ರಾಜ್ನಲ್ಲಿ ಪೊಲೀಸ್ ದೂರು ದಾಖಲಾಗಿದೆ. ವಂಚನೆ, ನಕಲಿ ದಾಖಲೆ ಸೃಷ್ಟಿ ಹಾಗೂ ಅವುಗಳನ್ನು ನೈಜ ದಾಖಲೆಗಳಂತೆ ಬಳಸಿದ ಆರೋಪಗಳ ಅಡಿಯಲ್ಲಿ ಅಪರಿಚಿತ ವ್ಯಕ್ತಿಗಳ ವಿರುದ್ಧ ತನಿಖೆ ಆರಂಭಿಸಲಾಗಿದೆ.
ಪ್ರಕರಣದ ತನಿಖೆ ನಡೆಸುತ್ತಿರುವ ಸೈಬರ್ ಕ್ರೈಂ ಪೊಲೀಸರು, ನಕಲಿ ಆದೇಶಗಳು ಕೇಂದ್ರದ ದೂರಸಂಪರ್ಕ ಇಲಾಖೆಯವರೆಗೆ ಹೇಗೆ ತಲುಪಿದವು ಎಂಬುದನ್ನು ಪತ್ತೆಹಚ್ಚಲು ಇಲಾಖೆಯ ಡಿಜಿಟಲ್ ದಾಖಲೆಗಳು, ಇ-ಮೇಲ್ ವಿವರಗಳು ಮತ್ತು ಕಂಪ್ಯೂಟರ್ ಲಾಗ್ಗಳನ್ನು ಕೇಳಿದ್ದಾರೆ. ಈ ಸಂಬಂಧ ಇಲಾಖೆಗೆ 24 ಪ್ರಶ್ನೆಗಳನ್ನು ಕಳುಹಿಸಿರುವುದಾಗಿ ವರದಿಯಾಗಿದೆ.
ನಕಲಿ ದಾಖಲೆಗಳನ್ನು ಯಾರು ಸೃಷ್ಟಿಸಿದರು, ಇದರ ಹಿಂದೆ ಯಾರಿದ್ದಾರೆ ಮತ್ತು ಕೃತ್ಯದಲ್ಲಿ ಕೃತಕ ಬುದ್ಧಿಮತ್ತೆ (AI) ಬಳಸಲಾಗಿದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
ಸರ್ಕಾರದ ಪರಿಶೀಲನಾ ವ್ಯವಸ್ಥೆಯೇ ಪ್ರಶ್ನಾರ್ಹ!
ಆನ್ಲೈನ್ ಬೆಟ್ಟಿಂಗ್ ಮತ್ತು ಜೂಜಾಟಕ್ಕೆ ಸಂಬಂಧಿಸಿದ ವೆಬ್ಸೈಟ್ಗಳ ವಿರುದ್ಧ ಕ್ರಮ ಕೈಗೊಳ್ಳುವುದು ಬೇರೆ ವಿಚಾರ. ಆದರೆ, ನ್ಯಾಯಾಲಯದ ಹೆಸರಿನಲ್ಲಿ ಯಾರೋ ಕಳುಹಿಸಿದ ದಾಖಲೆಗಳನ್ನು ಅಧಿಕೃತ ಆದೇಶಗಳೆಂದು ಪರಿಗಣಿಸಿ ಕೇಂದ್ರ ಸರ್ಕಾರದ ಇಲಾಖೆಯೇ ವೆಬ್ಸೈಟ್ಗಳನ್ನು ನಿರ್ಬಂಧಿಸಿರುವುದು ಗಂಭೀರ ಆತಂಕಕ್ಕೆ ಕಾರಣವಾಗಿದೆ.
ಇಂದು ಬೆಟ್ಟಿಂಗ್ ವೆಬ್ಸೈಟ್ಗಳ ವಿರುದ್ಧ ಇಂತಹ ವಂಚನೆ ನಡೆದಿದ್ದರೆ, ನಾಳೆ ಯಾವುದೇ ಮಾಧ್ಯಮ ಸಂಸ್ಥೆ, ಸುದ್ದಿ ಜಾಲತಾಣ, ಸಾಮಾಜಿಕ ಸಂಘಟನೆ ಅಥವಾ ಕಾನೂನುಬದ್ಧ ವ್ಯಾಪಾರ ಸಂಸ್ಥೆಯ ವೆಬ್ಸೈಟ್ಗಳನ್ನೂ ಇದೇ ರೀತಿಯಲ್ಲಿ ನಿರ್ಬಂಧಿಸುವ ಅಪಾಯವಿಲ್ಲವೇ?
ನ್ಯಾಯಾಲಯದ ಆದೇಶಗಳ ಸತ್ಯಾಸತ್ಯತೆಯನ್ನು ಪರಿಶೀಲಿಸದೆ ಸರ್ಕಾರಿ ಇಲಾಖೆಗಳು ಕ್ರಮ ಕೈಗೊಳ್ಳಲು ಸಾಧ್ಯವಾದರೆ, ಡಿಜಿಟಲ್ ಯುಗದಲ್ಲಿ ಅಭಿವ್ಯಕ್ತಿ ಸ್ವಾತಂತ್ರ್ಯ, ಮಾಧ್ಯಮ ಸ್ವಾತಂತ್ರ್ಯ ಮತ್ತು ನಾಗರಿಕರ ಹಕ್ಕುಗಳ ರಕ್ಷಣೆಯ ಹೊಣೆಗಾರಿಕೆ ಯಾರದ್ದು?
129 ವೆಬ್ಸೈಟ್ಗಳ ನಿರ್ಬಂಧದ ಪ್ರಕರಣ ಇದೀಗ ಕೇವಲ ಸೈಬರ್ ವಂಚನೆಯ ತನಿಖೆಗೆ ಸೀಮಿತವಾಗಿಲ್ಲ. ಕೇಂದ್ರ ಸರ್ಕಾರದ ಆಡಳಿತಾತ್ಮಕ ಹೊಣೆಗಾರಿಕೆ ಮತ್ತು ನ್ಯಾಯಾಂಗದ ಹೆಸರಿನಲ್ಲಿ ನಡೆಯುವ ವಂಚನೆಗಳನ್ನು ತಡೆಯುವ ವ್ಯವಸ್ಥೆಯ ವಿಶ್ವಾಸಾರ್ಹತೆಯನ್ನೇ ಪ್ರಶ್ನಿಸುವಂತಾಗಿದೆ.














