ಮುಂಬೈ: ಹಿಜಾಬ್ ಧರಿಸಿದ ಮಹಿಳೆಯೊಬ್ಬರು ಮುಂದೊಂದು ದಿನ ಭಾರತದ ಪ್ರಧಾನಿಯಾಗುತ್ತಾರೆ ಎಂಬ ಎಐಎಂಐಎಂ ಪಕ್ಷದ ನಾಯಕ ಮತ್ತು ಹೈದರಾಬಾದ್ ಸಂಸದ ಅಸಾದುದ್ದೀನ್ ಓವೈಸಿ ಅವರ ಹೇಳಿಕೆಗೆ ಬಿಜೆಪಿ ಕಟುವಾಗಿ ಪ್ರತಿಕ್ರಿಯಿಸಿದೆ.
ಜನವರಿ 15 ರಂದು ಮಹಾರಾಷ್ಟ್ರದಲ್ಲಿ ನಡೆಯಲಿರುವ ಸ್ಥಳೀಯ ಸಂಸ್ಥೆಗಳ ಚುನಾವಣೆಗೆ ಮುನ್ನ ಸೋಲಾಪುರದಲ್ಲಿ ಸಾರ್ವಜನಿಕ ಸಭೆಯನ್ನುದ್ದೇಶಿಸಿ ಮಾತನಾಡಿದ ಅಸಾದುದ್ದೀನ್ ಓವೈಸಿ, “ಪಾಕಿಸ್ತಾನದಲ್ಲಿ, ನಿರ್ದಿಷ್ಟ ಸಮುದಾಯ ಮಾತ್ರ ಉನ್ನತ ಸಾಂವಿಧಾನಿಕ ಹುದ್ದೆಗಳನ್ನು ಅಲಂಕರಿಸಬಹುದು ಎಂದು ಸಂವಿಧಾನ ಹೇಳುತ್ತದೆ. ಆದರೆ ಭಾರತದಲ್ಲಿ ಹಾಗಲ್ಲ. ದೇಶದ ಅತ್ಯುನ್ನತ ಸಾಂವಿಧಾನಿಕ ಹುದ್ದೆಗಳನ್ನು ಯಾರು ಬೇಕಾದರೂ ಅಲಂಕರಿಸಬಹುದು. ಭಾರತೀಯ ಸಂವಿಧಾನವು ಎಲ್ಲಾ ಸಮುದಾಯಗಳಿಗೂ ಸಮಾನ ಸ್ಥಾನಮಾನವನ್ನು ನೀಡಿದೆ.
ಭವಿಷ್ಯದಲ್ಲಿ, ಹಿಜಾಬ್ ಧರಿಸಿದ (ಇಸ್ಲಾಮಿಕ್) ಮಹಿಳೆ ಭಾರತದ ಪ್ರಧಾನಿಯಾಗುತ್ತಾರೆ. ಅದನ್ನು ನೋಡಲು ನಾನು ಜೀವಂತವಾಗಿರುವುದಿಲ್ಲ. ಆದರೆ ಅದು ಸಂಭವಿಸುತ್ತದೆ” ಎಂದು ಅವರು ಹೇಳಿದರು.
ಓವೈಸಿ ಅವರ ಭಾಷಣದ ಬಗ್ಗೆ ಪ್ರತಿಕ್ರಿಯಿಸಿದ ಕಾಂಗ್ರೆಸ್ ಸಂಸದ ಇಮ್ರಾನ್ ಮಸೂದ್, “ಅವರು ಅಸಾಧ್ಯವಾದ ವಿಷಯದ ಬಗ್ಗೆ ಮಾತನಾಡುತ್ತಿದ್ದಾರೆ. ಅದು ಹಗಲು ಹೊತ್ತಿನಲ್ಲಿ ನಕ್ಷತ್ರಗಳನ್ನು ನೋಡುವಂತಿದೆ. ಸಂಭವಿಸುವ ಸಾಧ್ಯತೆ ಇಲ್ಲದ ವಿಷಯದ ಬಗ್ಗೆ ಅವರು ಏಕೆ ಮಾತನಾಡಬೇಕು? ಪ್ರಜಾಪ್ರಭುತ್ವದಲ್ಲಿ ಎಲ್ಲರಿಗೂ ಹಕ್ಕಿದೆ. ಹಿಜಾಬ್ ಧರಿಸುವುದು ಅಥವಾ ಧರಿಸದಿರುವುದು ವೈಯಕ್ತಿಕ ವಿಷಯ” ಎಂದು ಅವರು ಹೇಳಿದ್ದಾರೆ.
ಶಿವಸೇನಾ ವಕ್ತಾರೆ ಶೈನಾ ಎನ್ಸಿ, “ಪ್ರಧಾನಿ ಹುದ್ದೆ ಖಾಲಿ ಇಲ್ಲ. ಮೊದಲು ನಿಮ್ಮ ಸದಸ್ಯರು ಸಂಸದರಾಗಲು ಬಿಡಿ. ಅದಾದ ನಂತರ, ನೀವು ಪ್ರಧಾನಿ ಹುದ್ದೆಯ ಕನಸು ಕಾಣಬಹುದು. ಒಬ್ಬ ಮಹಿಳೆ ದೇಶದ ಪ್ರಧಾನಿಯಾಗುವ ಕಾಲ ನಮಗೂ ಬೇಕು. ಆದರೆ ಅದು ಜಾತಿ, ಧರ್ಮ ಅಥವಾ ಸಮುದಾಯದ ಆಧಾರದ ಮೇಲೆ ಇರಬಾರದು, ಬದಲಿಗೆ ಅವರ ಒಳ್ಳೆಯ ಕೆಲಸಗಳು ಮತ್ತು ದೇಶದ ಜನರ ಬೆಂಬಲದ ಮೇಲೆ ಇರಬೇಕು” ಎಂದು ಹೇಳಿದ್ದಾರೆ.
ಓವೈಸಿಯವರ ಭಾಷಣಕ್ಕೆ ಪ್ರತಿಕ್ರಿಯಿಸಿರುವ ಬಿಜೆಪಿ ರಾಷ್ಟ್ರೀಯ ವಕ್ತಾರ ಶೆಹಜಾದ್ ಪೂನವಾಲಾ, “ಹಿಜಾಬ್ ಧರಿಸಿದ ವ್ಯಕ್ತಿ ದೇಶದ ಪ್ರಧಾನಿಯಾಗುತ್ತಾರೆ ಎಂದು ಓವೈಸಿ ಹೇಳುತ್ತಾರೆ. ಸಂವಿಧಾನ ಯಾರನ್ನೂ ತಡೆಯುವುದಿಲ್ಲ. ಆದರೆ, ನನ್ನ ಬಳಿ ನಿಮಗೊಂದು ಸವಾಲು ಇದೆ. ಪಾಸ್ಮಾಂಡ (Pasmanda) ಮುಸ್ಲಿಂ ಅಥವಾ ಹಿಜಾಬ್ ಧರಿಸಿದ ಯಾರಾದರೂ ನಿಮ್ಮ ಪಕ್ಷದ ನಾಯಕರಾಗಬಹುದೇ?” ಎಂದು ಕಟುವಾಗಿ ಪ್ರತಿಕ್ರಿಯಿಸಿದ್ದಾರೆ.
